Buenes a toos.

El mio nome ye Víctor y escomencié col asturianu haz unos 5 meses, cuando empecé a estudiar la mención d'asturianu na Universidá d'Uviéu.

Va yá tiempu que tuvi pensando y crear esti blog p'ayudar a la xente a entender la nuesa llingua y que vea que nun ye tan rara como parez. Antes de nada, quiero falar sobre´l problema que xurdió cola elección de la variante central d'esta llingua como standar. Yá se qu'hai la variante occidental y la oriental y que caúna d'elles tien les sos carauterístiques, pero hai qu'entender que la más falada ye la central pola cantidá de xente que vive nesta zona y que, como mayestru, hai que enseña-y a los escolinos que dientro de la nuesa comunidá autónoma podemos alcontrar diferencies y hai que comenta-yos qu'en cada zona hai ciertos rasgos que marcan la zona na que t'alcuentres, por exemplu, na zona occidental podemos alcontrar los casos nos que los plurales en vez de finar en "-les" como nel central, acaben en "-as" (exemplu: les vaques, nel central, las vacas, nel occidental) y que apaez como rasgo muncho más carauterísticu la "l.l vaqueira", que quier dicir que nos casos onde apaez la "ll" pronúnciase como "ts" (exemplu: llamuerga, nel central, l.lamuerga, nel occidental), también hai dalguna cosa más que se me pue escaecer. Pol otru llau ta la variante oriental, na que podemos alcontrar la "h." ("h" aspirada), que sustitúi a la "f" de la variante central (exemplu: "farina", nel central, "h.arina" nel oriental), pero tenemos que tener en cuenta qu'en tos llaos dizse: guah.e, guah.a, guah.es, guah.as y nun s'escribe como apaez na tele "guaje", amás hai que comentar que tamién s'usen los plurales en "-as", como nel occidental. Tamién tengo que comentar que como mayestru d'esta preciosa llingua, tengo qu'enseñar toles variantes, centrándome sobre too na variante de la zona na qu'esté dando clas.

Diré actualizando esti blog ca selmana, nalgunes entraes falaré de teoría/ortografía, n'otres de recomendaciones de llectures (onde espero vuesa participación) ,dalgunes veces pondré exercicios o xeres pa que prautiquéis la teoría y dalgo sobre tecnoloxía n'asturianu.

Un saludu.